Besimtarët në xhaminë e madhe në Mekke, falen larg njëri tjetrit

MAKKAH – Besimtarët në Xhaminë e Madhe në Mekke kanë ruajtur distancimin shoqëror gjatë namazit të Taravisë për të parandaluar përhapjen e koronavirusit, shkruan gazeta saudiane SG, por mbetet dilema nëse kjo mënyrë e të falurit në kohë Pandemie, mund të përmbushë rregullat e namazit me xhematë, e që nê këtë rast është mbushja e safëve, duke mos lënë zbrastira mes namazfalësve.

Fotografitë dhe videot treguan që Xhamia e Madhe në Mekë, duket kryesisht bosh nga adhuruesit në dy ditët e para të muajit të shenjtë të Ramazanit, pasi autoritetet mbyllën vendin e shenjtë si pjesë e masave për të luftuar përhapjen e koronavirusit.

Lutjet nga brenda xhamisë së madhe gjatë Ramazanit ishin të kufizuara për imamët, muezinët, stafin e sigurisë dhe pastruesit.

Më parë të enjten, Presidenca e Përgjithshme për Punët e Dy Xhamive të Shenjta hoqi barrikadat mbrojtëse të vendosura rreth Qabes së Shenjtë, si pjesë e masave paraprake për të parandaluar përhapjen e koronavirusit.

Mbi 3.500 punëtorë aktualisht janë duke punuar gjatë gjithë kohës për të sterilizuar xhaminë e madhe dhe oborret e saj të jashtme gjatë muajit të Ramazanit.

Kujdestari i dy Xhamive të Shenjta Mbreti Salman ka aprovuar një version të zvogëluar të lutjeve të Taravisë, të bëra në Xhaminë e Madhe në Mekë dhe Xhaminë e Profetit në Medinë, ndërsa ende pezullon publikun që të lutet brenda ndërtesave të dy xhamive gjatë Ramazanit, shkruan gazeta SG, përcjell IKRE.