Vajza e hoxhës Remzi Isaku, mer titullin Hafize e Kuranit

SHKUP: Në një ceremoni fetare të organizuar nga Myftinia e Shkupit, në Xhaminë e Dyqanxhikut, u promovua hafizeja më e re nga qyteti i Shkupit, hfz. Sara Isaki. Në këtë ceremoni, në një ambient gëzimi, prezentë ishin Kryetari i Bashkësisë Fetare Islame H. Hfz. Shaqir ef. Fetai

Në fillim, me fjalë përshëndetëse në emër të familjes Isaki, fjala i takoi Remzi ef.Isakit, njëherit edhe prind i hafizes së re, i cili falenderoi gjithë të pranishmit për prezencën e tyre.

Në cilësinë e nikoqirit të këtij organizimi të pranishmit i përshëndeti Myftiu i Shkupit Dr.Qenan ef. Ismaili i cili falënderoi të gjithë të pranishmit për prezencën e tyre në këtë ceremoni hifzi, duke shprehur mirënjohje ndaj familjes Isaki dhe gjithë atyre që ishin hisetarë në këtë rrugëtim të hafizes Sara Isaki.

Myftiu mes tjerash shtoi: “Nuk ka kënaqësi më të madhe se të prezentosh në këtë manifestim, ku kremtohet angazhimi, sakrifica disavjeçare e muhafizes Nehal Ibrahimi si dhe përkushtimi i hafizes së re për të memorizuar fjalën e All-llahut. Pikërisht për këtë arsye, në kalendarin e aktiviteteve tona si Myftini e Shkupit, këto manifestime rënditet në aktivitetet më të rëndësishme dhe më me peshë» – u shpreh Muftiu.

Në fjalën e tij të rastit, Reisul Ulema H. Hfz. Shaqir ef. Fetai tha: “Sot jemi këtu të përjetojmë gëzimin e madh tonin me rastin e shpalljes së hafizes më të re nga Myftinia e Shkupit.

Sot jemi këtu që të marrim shembull, të përurojmë dhe përgëzojmë si dhe ta festojmë veprën e madhe të muhafizes, të vlerësojmë arritjen, suksesin e madh të mbrojtëses së Kuranit Famëlartë, hfz.Sara Isaki.”

Hfz.Sara Isaki, është e lindur më 09 maj 2002, aktualisht nxënëse e Medresesë Isa Beu në Shkup, ndërsa nxënien e Kuranit përmendësh e filloi më 26 nëntor 2016 deri më 27 shtator 2020, tek muhafizja e saj Hfz. Nehal Ibrahimi.

Seancat degjimorë janë realizuar 6 ditë radhazi, 17 mars – 24 mars 2021 me metodën e re të aplikuar të dëgjimit të tërë Kuranit famëlartë para Komisionit për Vlerësim pranë Myftinisë së Shkupit i cili përbëhet nga: Hfz. Shafi ef. Osmani – Kryetar, Hfz. Sadudin ef. Sulejmani anëtar dhe Hfz. Sheval ef. Azizi, anëtar.

IKRE